SURKXON SANDWICH

Prezidentimiz Sh.Mirziyoyev tomonidan tadbirkorlikni har tomonlama qo‘llab-quvvatlash, ularga zarur sharoitlar, imtiyoz va imkoniyatlar yaratish orqali aholi farovonligini ta’minlashga yuksak e’tibor qaratilmoqda. Buning natijasida kichik va o‘rta biznes vakillari soni kundan-kun ko‘payib, mahsulot ishlab chiqarish, xizmat ko‘rsatish sohasida ular ishtiroki kengayib borayotir.

Shu kunlarda Termiz shahrida yana bir yangi korxona ish boshladi. “SURKXON SANDWICH” mas’uliyati cheklangan jamiyati tomonidan umumiy qiymati 1 mln. dollar bo‘lgan Sandwich panellari ishlab chiqaruvchi zamonaviy uskunalar o‘rnatilib, ishga tushirildi. Ushbu korxonada bugungi kunda 30 kishi ish bilan ta’minlandi. Korxona bir kunda 2 ming metr tayyor mahsulot ishlab chiqarish quvvatiga ega.

Uy-joy, yirik savdo majmualari, to‘qimachilik va yengil sanoat korxonalari, muzlatgichlar, cho‘milish havzalari kabi qurilish sohasining barcha yo‘nalishlarida ishlatiladigan Sandwich panellari Koreya-Xitoy texnologiyasi asosida ishlab chiqarilmoqda.

Ayni paytda korxonada ishlab chiqarilayotgan mahsulotga asosan to‘qimachilik va yengil sanoat korxonalari buyurtmachi bo‘layotir. Xususan, “Sherobod tekstil invest”, “Amudar teks” korxonalariga mahsulot yetkazib berish bo‘yicha shartnomalar imzolanib, Respublikaning boshqa viloyatlaridan ham buyurtmalar qabul qilinmoqda. Shuningdek, korxona ichki bozorni sifatli mahsulot bilan ta’minlash bilan bir qatorda, chet mamlakatlarga ham eksport qilishni rejalashtirgan.

Ma’lumot uchun shuni aytish mumkinki, shu yilning oxirigacha korxonada profnastil, cheripitsa, profil, penoplast va boshqa qurilish materiallari ishlab chiqarilishi yo‘lga qo‘yilib, ish o‘rinlari soni yana 50 taga ko‘payadi.