Аrosat yoqasida

O’sha paytlarda talaba edim. Darsdan xayol surib qaytayotgan mahalim bir ayol meni to’xtatdi. yelkasida og’irgina sumka.

-Siz to’kin, farovon, hayotda xushbaxt yashashni istaysizmi?

Dastavval uni nosog’lom deb o’yladim. Undan chekinib, yo’limda davom etayotgandim, meni to’xtatdi.

-Singlim, sizga aytayapman.

Men hayron bo’lib joyimda to’xtadim.

-Yаxshi yashab, jannatga tushishni istaysizmi?

Kuldim, kim buni istamaydi?

-Unda sizga mana bu kitob juda kerak, – dedi-yu ayol sumkasidan Injilni chiqardi.

-Rahmat, men so’nggi din – islomdaman, – dedim kulib.

– Yo’q, siz faqat mana bu din – xristian dinidagina baxt topib, jannatga kirishingiz mumkin.

Qo’l siltab ketishga shoshildim, “yo’q, shart emas!”.

-Bunda boy yashashning sirlari bayon etilgan, – gapdan to’xtamasdi ayol.

Men tezda qayrilib, yo’limda davom etdim. Yo’l-yo’lakay “Tavba, dinni ham sumkada ko’tarib sotish mumkin ekan…”, deb o’ylardim.  Bu men duch kelgan birinchi holat edi. Bu kabi, bir so’z bilan aytganda, “dinni sotuvchilar” ko’p emasdir balki, ammo ularga ko’r-ko’rona ergashganlar ko’pchilikni tashkil etishi mumkin. Nogoh turli dinlar bilan savdo qilayotgan shayton qiyofasidagilar ko’z o’ngimga keldi. Bu ayolga o’xshashlar ortidan ergashayotgan odamlar dunyoqarashi tor, manfaatning qullari, arosatda qolganlardir.

Ulardek manqurtga aylanib, arosat yoqasiga borib qolmasliklari uchun, yaxshi va yomonni ajrata olishlari uchun ota-onalar farzandlari yaxshi ta’lim olishi uchun jonbozlik qilishlari kerak. Yоshlar bo’sh vaqtlarini qanday o’tkazayotganliklarini nazoratga olish, ko’proq kitob mutolaasi bilan shug’ullanishlariga jiddiy e’tibor qaratish talab etiladi.

Дилдора Бекжонова