Suvchi ayol-Dilfuza: kasbimdan faxrlanaman

 Suvchi ayollar uchun kasbning eng katta qadriyati - odamlar duosini olish. Xonadonda krandan musaffo suv oqayotganini ko‘rish, muammo bilan murojaat qilgan fuqaroning masalasi hal etilganidan keyingi minnatdorligi ular uchun eng katta rag‘batdir.

Surxondaryoning jazirama yozlari, uzoq hududlari va turli sharoitlari suv ta’minoti sohasi xodimlaridan alohida matonat talab qiladi. Ba’zan ish vaqtidan tashqari paytda yuzaga kelgan nosozliklarni bartaraf etish, muammoli hududlarga tezkor yetib borish yoki suv ta’minotidagi uzilish sabablarini aniqlash zarur bo‘ladi. Aholi murojaatlari bilan ishlab kelayotgan suvchi Dilfuza Bekkamova bunday paytlarda erkak hamkasblari qatori o‘z vazifasini sidqidildan bajarib, xalq xizmatida ekanini amalda namoyon etmoqda.

Ayniqsa u kabi xodimlarning mehnati ko‘pincha ko‘zga tashlanmasligi mumkin. Ammo har bir ta’mirlangan tarmoq, qayta tiklangan suv ta’minoti, o‘z vaqtida ko‘rib chiqilgan murojaat va aholiga yetkazilgan ichimlik suvi ortida ana shu zahmatkash insonlarning mehnati turadi.

Ayollar uchun suv ta’minoti sohasida ishlash bir qarashda noodatiy kasbdek tuyulishi mumkin. Aslida esa zamonaviy suv xo‘jaligi tizimida ayollarning bilim va salohiyatiga ehtiyoj tobora ortib bormoqda.
Bugungi suvchi ayollar nafaqat o‘z vazifasini bajarmoqda, balki sohaga yangicha yondashuv, tartib-intizom va insonparvarlik tamoyillarini olib kirishda ham faol ishtirok etmoqda.

Ular orasida Dilfuza opadek muhandislar, dispetcherlar, abonentlar bilan ishlovchi mutaxassislar, laboratoriya xodimlari, hisobchilar, operatorlar va boshqa yo‘nalishlarda mehnat qilayotgan ayollar bor. Har birining o‘z vazifasi, o‘z mas’uliyati bo‘lsa-da, maqsadi bitta-aholini barqaror va sifatli ichimlik suvi bilan ta’minlash.

Ko‘pincha krandan oqayotgan suvning ortida qancha mehnat borligini o‘ylab ko‘rmaymiz. Aslida esa uning har bir tomchisi ortida suv inshootlari, quvurlar, nasoslar, laboratoriya nazorati va eng muhimi, inson mehnati turadi.

Shu ma’noda Dilfuza opa aytganidek suvchi ayollar mehnati nafaqat kasbiy faoliyat, balki jamiyat farovonligiga qo‘shilayotgan muhim hissadir. Ular har kuni odamlarning eng zarur ehtiyojlaridan birini ta’minlash uchun xizmat qilmoqda.

Surxondaryoning suvchi ayollari timsolida mehnatsevarlik, sabr, matonat va kasbga sadoqat mujassam. Ularning har bir ish kuni xalq farovonligi uchun qo‘yilgan yana bir muhim qadamdir.
Bugun Dilfuza oapdek  suvchi ayollarga qarab, bir haqiqatni anglash mumkin: ayolning kuchi faqat oila va tarbiyada emas, balki jamiyatning eng muhim sohalarida ham namoyon bo‘ladi.

Ularning mehnati ko‘zga ko‘rinmas bo‘lishi mumkin, ammo natijasi har bir xonadonda seziladi. Chunki musaffo suv oqayotgan har bir xonadonda, aslida, suvchi ayollarning ham zahmati, fidoyiligi va ezgu mehnati bor.