КАКАЙДИ ВА ТEРМИЗ ГАРНИЗОНЛАРИДА  ЎҚУВ АМАЛИЙ МАШҒУЛОТ ЎТКАЗИЛДИ

Маълумки, юртимизда ҳар йили 15 ноябрдан 15 декабргача “Ёнғин хавфсизлиги ойлиги” эълон қилиниб, ушбу ойлик доирасида жойларда турли тадбирлар ташкил этилади. Жануби-Ғарбий махсус ҳарбий округ тасарруфидаги Какайди ва Термиз гарнизонларида ҳам айни мавзуда кўргазмали ўқув амалий машғулотлари ўтказилди.

Инсонларнинг оддий эътиборсизлиги ва лоқайдсизлиги, ёнғин хавфсизлиги талаб ва қоидаларини билмаслиги ёки била туриб унга тўлиқ риоя этмасликлари оқибатида ёнғинлар, ис газидан захарланиш ҳолатлари содир бўлмоқда. Шунингдек фавқулодда ёнғин содир бўлганда, бошланғич ёнғинни тезда бартараф этишдаги нотўғри қилинган ҳаракатлар ҳам ёнғиннинг кескин тус олишига сабаб бўлади. “Ёнғин хавфсизлиги талаблари, фавқулодда ёнғин содир бўлганда, бошланғич ёнғинни зудлик билан бартараф этиш” мавзусида ташкил этилган  амалий машғулотда  зарур тушунчалар берилиб, амалий кўргазмалар орқали тадбир иштирокчиларига кўрсатмалар намойиш этилди.

Ушбу машғулотда Жануби-Ғарбий махсушарбий округ тасарруфидаги ҳарбий қисм ва муассасаларнинг моддий таъминот бўлинмаларидаги масъул ҳарбий хизматчилар иштирок этишди. Қумқўрғон тумани Фавқулодда вазиятлар бўлими,  Какайди ва Термиз гарнизонларидаги ҳарбий қисмлари, «Термиз» қўшинларни ёқилғи билан таъминлаш ҳудудий маркази ёнғин ўчириш бўлинмалари ва техникалари иштирокидаги намойишлар тадбир моҳиятини очиб берди.

Тадбир давомида мутасадди ходимлар томонидан ҳарбий қисмдаги бинолар ва ҳарбий шаҳарчаларда ёнғин хавфсизлиги талабларига риояқилиниши лозимлиги, яшаш хонадонларида мавжуд бўлган газ ва электр мосламаларидан тўғрифойдаланиш, уларни белгиланган муддатларда техник кўрикдан ўтказиш каби зарурий маслахатларни таъкидлаб ўтишди.

Машғулот якунида ёқилғи мойлаш махсулотларини сақлаш омборида шартли ёнғин командаси берилиб, омбор бошлиғи ва ишчилари томонидан бирламчи ёнғинни ўчиришдаги ҳаракатланиш тартиби амалда кўрсатиб берилди.

Бундай тадбирлар бошқа гарнизонларда ҳам ўтказилиши ражалаштирилган.