TERMIZ: yuz berayotgan o’zgarishlar

Istiqlol. Surxondaryo viloyatini, ayniqsa uning markazi bo‘lgan jonajon Termiz shahrimizning qiyofasini butunlay o‘zgartirib yubordi. Bugun ko’chalarni kezmang yangilanishlardan bu zaminni taniy olmaysiz. Shuning uchun ham unga Birinchi Prezidentimiz Islom Karimov  farmoniga asosan «Amir Temur» ordeni  berilgani ham yarashib turibdi.

Qisqa 26 yil davomida  shahar qiyofasining o’zgarishini ko’z oldimizga keltirsak faxrlanadigan o’zgarishlar talaygina. Misol uchun Termiz davlat universitetining yangi, zamonaviy binosi, 10 ming tomoshabinga mo‘ljallangan «Surxon» sport majmuasi, yana  «Yoshlar markazi» bilan «Baxt uyi» binolarini aytmaysizmi. Barchasini aytsak bir kitobdan oshgulik bunyodkorlik ishlari bisyor.

 Har gal ishga yo’l olganimda  keng va ravon avtomobil yo‘llari, ko‘p qavatli turar-joy, jamoat va servis xizmatlari ko‘rsatadigan binolarni ko’rib hursand bo’laman. Ayniqsa tariximizdan so’zlab turgan obidalarimiz haqida gapirmasam ham  ularning o’zi bir maqolamga mavzu bo’ladi. Termiz shahrining 2200 yilligi munosabati bilan tashkil qilingan Markaziy Osiyoda yagona hisoblangan Arxeologiya muzeyi yaqindagina ta’mirdan chiqib, bugun  undagi eksponantlarni ko’rish istagida insonlar bilan gavjum bo’lsa qayta ta’mirlanib, obodonlashtirilgan Hakim at-Termiziy, Iso At-Termiziy ziyoratgohlaridan sayyohlar qadami uzilmaydi.

Mustaqillik yillarida Angliya, Xitoy, Rossiya, Koreya va boshqa xorijiy mamlakatlar bilan ko‘plab qo‘shma korxonalar tashkil qilindi. Quvonarlisi, Yurtboshimiz Sh.Mirziyoyev tomonidan tadbirkorlikni har tomonlama qo‘llab-quvvatlash orqali aholi farovonligini ta’minlashga yuksak e’tibor qaratmoqda. Natijada Termiz shahrida bir qancha yangi korxonalar  ish boshladi. Bu haqida viloyat hokimligi saytida o’qib qoldim. Shahrimizda umumiy qiymati 1 mln. dollar bo‘lgan zamonaviy uskunalar o‘rnatilgan Sandwich panellari ishlab chiqaruvchi “SURKXON SANDWICH” mas’uliyati cheklangan jamiyati ishga tushirildi. Ushbu korxonada bugungi kunda 30 kishi ish bilan ta’minlandi. Korxona bir kunda 2 ming metr tayyor mahsulot ishlab chiqarish quvvatiga egaligi bilan yetakchi. Sandwich panellari Koreya-Xitoy texnologiyasi asosida ishlab chiqarilmoqda.Ayni paytda korxonada ishlab chiqarilayotgan mahsulotga asosan to‘qimachilik va yengil sanoat korxonalari buyurtmachi. Xususan, “Sherobod tekstil invest”, “Amudar teks” korxonalariga mahsulot yetkazib berish bo‘yicha shartnomalar imzolanib, Respublikaning boshqa viloyatlaridan ham buyurtmalar qabul qilinmoqda. Shuningdek, korxona ichki bozorni sifatli mahsulot bilan ta’minlash bilan bir qatorda, chet mamlakatlarga ham eksport qilishni rejalashtirgan.

Bu kabi korxоnalar soni ortishi esa viloyatimizda maxsulot hajmi ortishiga axolining bandligini ta’minlashga va ularning turmush darajasi yanada yaxshilanishiga zamin yaratmoqda. Shunday korxonalardan "Amudar Teks" O‘zbekiston - Angliya qo‘shma korxonasi ishga tushirilgach, 400 kishining bandligi ta’minlanib, yiliga 5 ming tonna kompakt ip-kalava va 3 ming tonna bo‘yalgan ip-kalava ishlab chiqarish yo‘lga qo‘yiladi. Buning uchun 28 mln. dollar mablag‘ sarflanishi ko‘zda tutilgan.

Sherobod tumanidagi "Sherobod tekstil invest" MChJda ham yiliga 15 ming tonna ip-kalava, 5 ming tonna bo‘yalgan ip-kalava, 4 ming tonna trikotaj mato, 2,5 mln. dona tikuvchilik mahsuloti ishlab chiqarish loyihasini amalga oshirish bo‘yicha qurilish ishlari boshlab yuborilgan. Zamonaviy xorij dastgohlari o‘rnatiladigan ushbu korxona to‘la quvvat bilan ish boshlagach, 600 ta yangi ish o‘rni yaratiladi. Qiymati 58 mln. dollar bo‘lgan mazkur loyiha 2018-2019 yillarda ish boshlashi nazarda tutilgan.

Kundan-kun rivojlanayotgan Termiz har tamonlama chiroy ochmoqda. Mustaqillik bergan imkoniyatlar shahar husniga ko’rk bag’ishlab, uning bag’rida yashayotgan insonlarning har kuni shukronalik ila o’tishiga sabab bo’lmoqda. Shu zaminda  faxr bilan yashayotgan insonlar yanada shaxrimiz gullab-yashnashi uchun hissa qo’shmoqda.  Xullas, shahrimizda yuz bergan va yuz berayotgan o‘zgarishlar bisyor. Bunyodkorlik ishlari esa bardavom bo’lib, kelajak avlod uchun faqat ko’rkam va tarix bilan uyg’unlashgan Termiz qurmoqdamiz.

Mastura Xamroyeva