Kechagi uy bekasi — bugun jamiyatning faol a’zosi

Ayoli ulug‘langan yurtda yashashdan ortiq baxt bo‘lmasa kerak. Ayollarimiz iqtisodiy, ijtimoiy tomondan keng qo‘llab-quvvatlanayotir. Xotin-qizlarning baxti, kamoli, istiqbolini ko‘zlagan va buni oliy maqsad, deb bilgan mamlakat dunyoda kamdan-kam topiladi.

Bugun O‘zbekistonda yashayotgan har bir ayol, chin ma’noda, baxtli. O‘zbekiston Respublikasi Konstitutsiyasi, o‘nlab qonunlar, saksonga yaqin farmon va qarorlar, davlat dasturlari xotin-qizlarning ijtimoiy-siyosiy faolligini oshirish, oila va jamiyatdagi mavqeini mustahkamlash, oila, onalik va bolalikni muhofaza qilishda huquqiy asos bo‘lib xizmat qilmoqda. Shuningdek BMTning Xotin-qizlar huquqlari kamsitilishining barcha shakllariga barham berish to‘g‘risidagi konvensiyasi (SYeDAW), Xotin-qizlarning siyosiy huquqlari to‘g‘risidagi, Xalqaro mehnat tashkilotining Onalikni muhofaza qilish to‘g‘risidagi, Mehnat va bandlik sohasida kamsitishlar to‘g‘risidagi konvensiyalar va boshqa bir qator xalqaro hujjatlar milliy qonunchiligimizda o‘z ifodasini topgan va ularning bajarilishi ta’minlanmoqda.

1996-yilda Vazirlar Mahkamasi tomonidan O‘zbekiston Respublikasida xotin-qizlarning ahvolini yaxshilash bo‘yicha konsepsiyaning qabul qilingani, BMT qo‘mitasiga Xotin-qizlar huquqlari kamsitilishining barcha shakllariga barham berish to‘g‘risidagi konvensiyasi ijrosi bo‘yicha Milliy ma’ruza taqdim etilayotgani opa-singillarimizning konstitutsiyaviy huquqlarini ro‘yobga chiqarishga xizmat qilmoqda.

Mamlakatimiz aholisining yarmidan ko‘prog‘ini tashkil etuvchi xotin-qizlar islohotlar jarayonida faol qatnashib, Vatanimiz taraqqiyoti, uning yanada gullab-yashnashiga munosib hissa qo‘shmoqda.

Bundan o‘n — o‘n besh yillar ilgari faqatgina ijtimoiy sektor, ayniqsa, ta’lim va tibbiyot sohasi xodimlarining asosiy qismini ayollar tashkil etgan bo‘lsa, hozirgi vaqtga kelib, respublikamiz iqtisodiy rivojida katta ahamiyatga ega bo‘lgan bank-moliya, ishlab chiqarish kabi sohalarda, avtomobilsozlik, mikrobiologiya, farmatsevtika, elektron va elektrotexnika sanoati, axborot-kommunikatsiya texnologiyalari, servis va bozor iqtisodiyoti xizmatlari kabi yuqori texnologiyalarga asoslangan zamonaviy tarmoqlarda ham xotin-qizlarimizning hissasi tobora ortib bormoqda.