Missionerlik milliyligimizga yot tushuncha

                Bugungi kunda taraqqiyotimiz rivojiga kuchli ta’sir ko‘rsatayotgan ijtimoiy omillar qatorida diniy omilning alohida o‘rni bor.

Din qadimdan inson turmush tarzining ajralmas bir bo‘lagi bo‘lib kelgan. Din yaratuvchanlik va bunyodkorlik, uyushturuvchanlik va yo‘naltiruvchanlik salohiyatlarini namoyon qilib, jamiyat rivoji hamda inson kamolatiga xizmat qilib kelgan. Shu bilan birgalikda insoniyat tarixida aynan dindan foydalanib, uni niqob qilib olib buzg‘unchilik va vayronkorlik ishlarini amalga oshirgan insonlar va davrlar ham bo‘lgan. Ayni ana shunday g‘arazli maqsadlarda dindan foydalanish, bugungi kunimizda ham mavjuddir. Turli shakllarda namoyon bo‘layotgan missionerlik harakati bunga misoldir.

         Missionerlik harakati va mohiyatidan oldin ushbu so‘zning lug‘aviy ma’nosiga ahamiyat qaratsak. Missionerlik atamasiga ko‘plab ta’riflar keltirib o‘tilgan. Jumladan har yili qayta nashr etiladigan “World Book”(“Jahon kitobi”) ensiklopediyasida: “Missioner – biror diniy guruh tomonidan boshqalarni o‘z diniga targ‘ib qilish va kiritish uchun yuboriladigan inson”- degan fikr qayd etilsa, Moskvada nashr etilgan “Kirill va Mefodiyning katta ensiklopediyasi ”da esa “Missionerlik – biror diniy birlashma vakillarining o‘z e’tiqodini boshqa din vakillari orasida yoyish harakati ”– degan ta’rif keltirilgan. Bundan anglashimiz mumkinki missionerlik boshqa din vakillari orasida o‘z dinini targ‘ib etish harakatidir. Bu harakat ayni bugungi asrimizda ham turli shakllarda: ijtomoiy yordam, internet tanishuvlari va boshqalarda o‘zini namoyon etmoqda.

         Bugungi kunda dinga bo‘lgan qiziqishning kuchayib borishi globallashuv jarayonining o‘ziga xos in’nikosidir. Bu jarayonlar o‘z navbatida inson ma’naviyatining uzviy qismi bo‘lgan dinning mohiyatini tushunish, uning inson va jamiyat hayotidagi o‘rnini anglashga bo‘lgan e’tiborning kuchayishini keltirib chiqarmoqda. Ayrim mamlakatlarda yuzaga kelayotgan keskin diniy murosasizliklar, vayronkorliklarnnig bevosita va bilvosita sabablari ham aynan missionerlik faoliyatlariga ham bog‘liqdir.Birgina BMT ma’lumotlariga ko‘ra missionerlik harakatlari natijasida xristianlikning o‘sish ko‘rsatgichi yiliga 1.46 % ni tashkil etmoqda.

         Missionerlik – milliy birlik va jamiyat barqarorligi uchun tahdidga aylangan ekan, unga qarshi kurash, uning oldini olishga qaratilgan ishlarni tizimli tashkil etish bugungi kunning dolzarb vazifalaridan biri hisoblanadi.Buning uchun esa mamalakatimida yetarli huquqiy asoslar ham yaratilgan. O‘zbekistonda din erkinligi, fuqarolarning shaxsiy huquq va erkinliklari ta’minlangan. Konstitutsiyamizda ham barcha fuqarolar qonun oldida teng ekanligi[18-modda], shuningdek, har kimning e’tiqod erkinligi huquqi, uning asosiy huquqi sifatida e’tirof etilishi belgilangan. Bosh qomusimizning 31-moddasida har kim vijdon erkinligiga ega ekanligi ta’kidlangan holda, diniy birlashmalar tuzulishi uchun ham ruxsat berilgan [57-modda]. Shu bilan birgalikda milliy va diniy adavotni targ‘ib qiluvchi birlashmalarning tuzulishi taqiqlangan. Missionerlar o‘zlarining xushmuomlaligi, yorqin va ta’sirchan va’zlari bilan chalg‘itishga, o‘z “o‘lja”larining qiziqishlarini hisobga olib, do‘stona munosabatga kirib olishga va oxir oqibat ularni taklif etayotgan dinini taklif etishga da’vat etadilar.

          Missionerlik harakatini oldini olish uchun, avvalo, milliy qadriyatlarimiz va dinimizga hurmatni, muhabbatni kuchaytirishimiz lozim. Ota-bobolarimizning o‘git va nasihatlaridan bahramand bo‘lmog‘imiz kerak. Buyuk hadisshunoslarning hadislari-yu, allomaning dini diyonatimiz haqidagi fikrlari teran anglashimiz muhimdir. Har birimizda ertangi kunimiz, farovon hayotimiz hamda Vatanimizning tinchligiga dahldorlik tuyg‘usi bor ekan, hech qachon befarqlikka o‘rin bermaylik. Doimo teran idrok, o‘tkir nigoh bilan tevarak –atrofimizga e’tiborli bo‘laylik.